Sinubukang kong buklatin kung paano kinukuha ang Determinants ng isang kuwadradong matrix. Walang determinants ang parihabang matrix na hindi pareho ang bilang pahalang at bilang patayo.
Ang konsepto ng Calculus ay pagkuha ng pag-aari ng isang maliit na bagay mula sa isang bagay. Yung mga maliliit na bagay na yun kapag pinagsama-sama ang bubuo ng isang bagay. Bigla ko tuloy naisip yung kanta ng Asin na sinulat ni Nonoy Pillora, Jr. - "Tuldok". Yan ang konsepto ng Calculus na halos sabay na formulate ni Newton at Leibniz. Inisip ko na maaari itong gamitin din siguro sa Matrix.
Kung maaalala natin ang Atom ang bumubuo sa isang bagay. May mga tinatawag na cell ang buhay na nilalang. Lahat ng bagay ay binubuo ng maliliit na bagay. Kung sakali, paano kaya ang isang Matrix? Bakit kailangan ng determinant? May mas madali bang paraan para makuha ang determinant?
Ang natuklasan ko, nang bulatlatin ko ang mga formulang ginagamit, ang mga numero sa loob ay magkakabahagi para sa Determinant. Lahat ng miyembro sa loob ng Matrix ay kailangang gamitin para makuha ang Determinant. Kailangan kasi ng Determinant para makuha ang kabaliktaran nito. Madali kong nagawa ang formula para rito sa Spreadsheet ng Openoffice, pero hanggang 5x5 matrix lang. Kung tutuusin may mga 1000 x 1000 o higit pa na matrix. Nakakalulang isipin kung paano kuhain yung determinant nun, lalo na yung kabaliktaran.
Magkakaugnay ang mga bilang. Naaalala ko tuloy yung Ohana ng Hawaii. Walang isasantabi, walang iiwan. Sama-sama.
Kung gayon may paraan ba para masolusyunan ang mga ganung kalaking problema? Meron. Mahirap kung mahirap dahil wala namang madali sa mundo.
Si Cholesky nakagawa ng paraan para mapadali ang pagkuha ng solusyon, yun nga lang depende sa laman ng Matrix, dapat Positive Definite. Gusto ko sanang gumawa ng pangkalahatang solusyon para sa malalaking matrix, pero mukhang imposible sa taglay kong karunungan sa ngayon. Subukan ko muna yung ginawa ni Cholesky na depende sa laman baka mapadali kahit kaunti. Makatulong kahit paano. Tingnan natin.
